ब्रेकिंग

देश

जम्मू-काश्मीरमध्ये मुसळधार पाऊस; श्रीनगर महामार्ग बंद

Samruddhi Dhayagude
09 May 2025

श्रीनगर : जम्मू-काश्मीरमध्ये मुसळधार पाऊस सुरू असून, गुरूवारी अनेक ठिकाणी दरड कोसळल्याच्या घटना घडल्या. रामबनमधील जम्मू-श्रीनगर राष्ट्रीय महामार्गावर (एनएच ४४) मोठ्या प्रमाणात चिखल साचल्यामुळे वाहतूक पूर्णपणे बंद करण्यात आली आहे. मुसळधार पावसानंतर रामबन बाजारातही पूरसदृश परिस्थिती निर्माण झाली आहे.

गुरूवारी सकाळी ७.३० वाजल्यापासून हा रस्ता बंद आहे. अनेक वाहने चिखलात अडकली असून, त्यांना बाहेर काढण्यात येत आहे. दूरवर लांब वाहतूक कोंडीची समस्या आहे. मुसळधार पावसामुळे चिनाब नदीवरील रामबन येथील बागलिहार धरणाचे दोन आणि रियासी येथील सलाल धरणाचे एक दरवाजे उघडण्यात आले आहेत. पहलगाम हल्ल्यानंतर दोन्ही धरणे बंद करण्यात आली होती.

रामबन बाजारपेठेत पूरसदृश्य स्थिती आहे. रामबन शहराजवळील चंबा-सिरी येथे दरड कोसळली, तर रामबन बाजारपेठेतील एका हॉटेलजवळ अचानक आलेल्या पुरामुळे अनेक वाहनांचे नुकसान झाले. त्यामुळे खराब हवामानात प्रवाशांनी राष्ट्रीय महामार्ग ४४ वरून प्रवास करू नये. हवामान सुधारेपर्यंत आणि रस्ता मोकळा होईपर्यंत राष्ट्रीय महामार्ग-४४ वरून प्रवास करणे टाळा, असे आवाहन वाहतूक विभागाने केले आहे.

दरम्यान, हवामान विभागाने ८ ते १२ मे दरम्यान जम्मू आणि काश्मीरमध्ये यलो अलर्ट जारी केला आहे. हवामान विभागानुसार जम्मू-काश्मीरच्या काही भागात मुसळधार पाऊस आणि जोरदार वारे वाहण्याची शक्यता आहे. तसेच, काही संवेदनशील भागात मुसळधार पावसामुळे दरड कोसळण्याची शक्यता आहे. याशिवाय, उत्तर प्रदेश-छत्तीसगडसह १९ राज्यांमध्ये वादळ आणि पावसाचा इशारा देण्यात आला आहे. मध्य प्रदेश आणि राजस्तानमधील २२-२२ जिल्ह्यांमध्ये पावसाची शक्यता आहे. मध्य प्रदेशातील सहा जिल्ह्यांमध्ये गारपीट होण्याची शक्यता आहे.